មិត្តជាបំណែកដ៏ធំនៃជីវិតរបស់យើង។ យើងមិនអាចរស់នៅសុខសាន្តដោយគ្មានមិត្តនោះទេ។ មនុស្សគ្រប់រូបត្រូវការមិត្តភ័ក្ដិដើម្បី ចែករំលែកសេចក្ដីសុខ ទុក្ខព្រួយ ចម្ងល់ និងការព្រួយបារម្ភជាដើម។ ជីវិតយើងនឹងខ្វះអត្ថន័យ បើខ្វះមិត្តល្អ។ យើងដឹងថាមិត្តល្អសំខាន់ តែអ្នកខ្លះមិនដឹងថាត្រូវធ្វើយ៉ាងណាទើបមានមិត្តល្អនោះទេ។ ហើយអ្នកខ្លះទៀតនោះមិនដែរមានមិត្តយល់ចិត្តសោះក្នុងមួយឆាកជីវិត។ ដើម្បីមានមិត្តល្អរាប់អាន លុះត្រាតែយើងធ្វើខ្លួនជាមិត្តល្អជាមុនសិន។ ខាងក្រោមនេះជាអ្វីដែលត្រូវធ្វើដើម្បីក្លាយខ្លួនជាមិត្តល្អ៖បើចិត្តទូលាយ
អ្នកផងទាំងពួងនឹងចូលមកជិត បើអ្នកជាមនុស្សដែលរួសរាយរាក់ទាក់និងមានអធ្យាស្រ័យល្អ។ ធ្វើបែបនេះនឹងធ្វើឲ្យពួកគេយល់ថាមានអារម្មណ៍កក់ក្ដៅ និងកាន់តែមានភាពស្និទ្ធស្នាល។
សម្ដីមានន័យ
កត្តាដែលទាក់ទាញមនុស្សបំផុតគឺរបៀបដែលអ្នកនិយាយ។ ការនិយាយស្ដីអាចឆ្លុះបញ្ចាំងនូវអត្តចរិតនិងចំណេះដឹង។ និយាយយ៉ាងណាកុំបែកជាអូរហូរជាស្ទឹងឲ្យសោះ ត្រូវលើកពីប្រធានបទប្លែកៗមកពិភាក្សាដើម្បីឲ្យគេយល់ថាជជែកជាមួយអ្នកមានអារម្មណ៍រីករាយនិងទទួលបានចំណេះដឹងច្រើន។
កុំបង្ហាញការត្រួតត្រា
ដើម្បីទទួលបានមិត្តភាពល្អភាគីទាំងសងខាងចាំបាច់ត្រូវស្វែងយល់ពីចិត្តគ្នាទៅវិញទៅមក។ ការវាយឫក ភាពក្រអឺតក្រទម និងចរិតចង់ត្រួតត្រា ជាដើមចមដែលធ្វើឲ្យមានគំលាតរវាងគ្នានិងគ្នា។ ទោះបីជាពេលខ្លះ អ្នកដទៃបញ្ចេញសម្ដីមិនសមគួរឬមិនត្រឹមត្រូវ តែអ្នកគួរតែរក្សាភាពថ្លៃថ្នូរ មិនស្ដីបន្ទោសហួសទំនងឡើយ។
ធ្វើកិច្ចការរួមគ្នា
អ្នកត្រូវចាំថាកាន់តែមានទំនាក់ទំនង កាន់តែស្និទ្ធស្នាល។ អ្នកត្រូវព្យាយាមសាងអនុស្សាវរីយ៍និងធ្វើអ្វីៗរួមគ្នាឲ្យបានច្រើន ដូចជា ទៅដើរកម្សាន្តតាមរមណីយដ្ឋាននានា មើលកុន ហាត់ប្រាណ ឬចូលរួមជួយកិច្ចការសង្គមជាដើម។
ជឿទុកចិត្តទំនាក់ទំនងល្អដាច់ខាតត្រូវជឿជាក់លើគ្នាទៅវិញទៅមក។ ការជឿជាក់ធ្វើឲ្យមនុស្សហ៊ានបង្ហាញពីអារម្មណ៍របស់ខ្លួនអស់ពីចិត្ត។ បើគ្មានការទុកចិត្ត មានតែការសង្ស័យ នោះភាពរីករាយនិងទុក្ខព្រួយនឹងមិនត្រូវបានចែករំលែកឲ្យគ្នាឡើយ។
ការលើកទឹកចិត្ត
នៅពេលដែលមិត្តធ្វើអ្វីមួយ មិនខ្វល់ថាធ្វើសម្រាប់អ្នកឬអ្នកដទៃនោះទេ អ្នកត្រូវបង្ហាញនូវភាពពេញចិត្ត និងផ្ដល់ពាក្យសរសើរសម្រាប់គេ។ បើយកល្អ នៅក្នុងជីវិតរស់នៅប្រាស្រ័យទាក់ទងជាមួយនឹងអ្នកដទៃ អ្នកគួរតែប្រើឲ្យរត់មាត់នូវពាក្យអរគុណនិងពាក្យសរសើរ។ ការលើកទឹកចិត្តធ្វើឲ្យមនុស្សមានកម្លាំងចិត្ត និងយល់ថាខ្លួនមានទីពំនាក់។
កុំរំពឹងខ្ពស់
មនុស្សម្នាក់ៗមានលក្ខណៈខុសគ្នា គិតខុសគ្នា ដូច្នេះអ្នកមិនត្រូវរំពឹងចង់ឲ្យអ្នកដទៃធ្វើដូចបំណងអ្នកនោះទេ។ ការរំពឹងខ្ពស់តែលទ្ធផលមិនសមដូចបំណង នឹងធ្វើឲ្យមានការខកចិត្តជាមិនខាន។ ហេតុនេះហើយ អ្វីដែលអ្នកត្រូវធ្វើគឺធ្វើដូចធម្មតា កុំឲ្យទំនាក់ទំនងមានភាពស្មុគស្មាញឲ្យសោះ។